„მეცნიერებისა და ინოვაციების ფესტივალი – 2019-ის“ ფარგლებში ივანე ჯავახიშვილის სახელობის თბილისის სახელმწიფო უნივერსიტეტში საბავშვო უნივერსიტეტის ღია კარის დღე გაიმართა. თსუ-ის სტუდენტებმა და პროფესორებმა სკოლის მოსწავლეებისთვის სახალისო ექსპერიმენტები ქიმიაში, ბიოლოგიასა და ფიზიკაში ჩაატარეს. წარმოდგენილი იყო საინტერესო ექსპონატები თსუ-ის ზოოლოგიისა და მინერალოგიის მუზეუმებიდან. ღონისძიებაზე მისულ მოსწავლეებს საშუალება ჰქონდათ მონაწილეობა მიეღოთ იმიტირებულ არქეოლოგიურ გათხრებში.
თსუ-ის ანდრია რაზმაძის სახელობის მატემატიკის ინსტიტუტის მთავარმა მეცნიერ-თანამშრომელმა თორნიკე ქადეიშვილმა მოსწავლეებისათვის წაიკითხა პოპულარული ლექცია მათემატიკაში „მათემატიკა ყველგან“, ხოლო, თსუ-ის პროფესორი გიორგი დვალაშვილი მოსწავლეებს ესაუბრა ბუნების ძეგლების როლზე ტურიზმის განვითარებაში.
