საქართველოს ფოლკლორის სახელმწიფო ცენტრმა დავით ჯავრიშვილის 125 წლისთავისადმი მიძღვნილ ღონისძიებებს უმასპინძლა. მეცნიერებისა და ინოვაციების ფესტივალის ფარგლებში დავით ჯავრიშვილის ცხოვრებისა და შემოქმედების ამსახველი გამოფენა – „მხატვრული ტანვარჯიშიდან ქორეოგრაფიულ ხელოვნებამდე“ და სამეცნიერო შრომების კრებულის ,,ქართული ხალხური ცეკვის“ პრეზენტაცია გაიმართა.
გამოცემა საკმაოდ მოცულობითია და დავით ჯავრიშვილის გამოქვეყნებულ შრომებთან ერთად ხელოვნების სასახლის არქივში დაცულ 20-მდე უცნობი ცეკვის ნახაზსა და 25-მდე პირად წერილს აერთიანებს. წიგნში პირველად დაიბეჭდა „ქართველ ქალთა ცეკვები“ (რვა ცეკვა), კინოფირიდან გაშიფრული თოთხმეტი სვანური ფერხული. წიგნი ბოლოვდება ფოლკლორის სახელმწიფო ცენტრის სპეციალისტთა მიერ შედგენილი 500 სიტყვიანი ლექსიკონით. გარდა ამისა, ღონისძიებაზე ნაჩვენები იყო 1934 წლის სვანეთის ექსპედიციის დროს გადაღებული კინოფილმი „აცეკვებული სვანეთი“.
დავით ჯავრიშვილი ქართული ტანვარჯიშის ერთ-ერთი ფუძემდებელი, ცნობილი ბალეტმაისტერი, ქორეოგრაფი, ქორეოლოგი, ქართული ცეკვის გამორჩეული მკვლევარი და პედაგოგ-ქორეოგრაფი იყო. მის სახელს უკავშირდება ქართული კლასიკური ქორეოგრაფიის განვითარება და 80-მდე ქართული ხალხური ცეკვის დადგმა. 1935 წელს ლონდონის საერთაშორისო ფესტივალზე დავით ჯავრიშვილი ქართველ მოცეკვავეთა ჯგუფს ხელმძღვანელობდა. ამას 1951 წლის ბერლინის საერთაშორისო და 1955 წლის ვარშავის ახალგაზრდობისა და სტუდენტთა V მსოფლიო ფესტივალები მოჰყვა.
