„მეცნიერებისა და ინოვაციების ფესტივალი – 2019-ის“ ფარგლებში საერთაშორისო კონფერენცია “IV ინდუსტრიული რევოლუცია და ბლოკჩეინი- eGovo/GovTech ბლოკჩეინის ეპოქაში“ გაიმართა. მონაწილეებმა განიხილეს ბლოკჩეინის შესაძლებლობები საჯარო ადმინისტრირებისა და ელექტრონული მმართველობის სფეროში.
კონფერენცია ექვს ძირითად მიმართულებას მოიცავდა: ინდუსტრია 4.0 და ციფრული ტრანსფორმაცია, ბლოკჩეინი და eGov/Govtech, ბლოკჩეინი და საჯარო ფინანსების მენეჯმენტი, ბლოკჩეინი და ენერგოსექტორი, ბლოკჩეინი და განათლების სფერო, ბლოკჩეინი და რეგულაციები.
კონფერენციის მონაწილეებს სიტყვით მიმართა შოთა რუსთაველის საქართველოს ეროვნული სამეცნიერო ფონდის გენერალურმა დირექტორმა ზვიად გაბისონიამ: „ბლოკჩეინი, მისი შესაძლებლობების გამოყენება ძალზე მნიშვნელოვანია ქართული მეცნიერებისთვის, მას, როგორც დეცენტრალიზებულ სისტემას დიდი მომავალი აქვს. საქართველო მსოფლიოში ერთ-ერთი წარმატებული ქვეყანაა საჯარო სექტორში ბლოკჩეინ ტექნოლოგიების დანერგვის თვალსაზრისით. იუსტიციის სამინისტროს დანერგილი აქვს ეს სისტემა უძრავი ქონების რეგისტრაციის ნაწილში, ესტონეთის შემდეგ, რაც საკმაოდ ინოვაციურ პროექტად ითვლება. განათლების სფეროში აქტიურად ვმუშაობთ, რომ დიპლომების ნაწილი გადავიტანოთ ელექტრონულ ფორმატში, გამოვიყენოთ ბლოკჩეინ ტექნოლოგიები. რუსთაველის ფონდის მიზანია, ეს ტექნოლოგიები ფართოდ დანერგოს მეცნიერების მართვაში, მენეჯმენტში. წარდგენილი გვაქვს საგრანტო პროექტი Horizon 2020 -ის ერთ-ერთ მიმართულებაში- ERC-ში და წარმატების შემთხვევაში, ამ ტექნოლოგიის ფართოდ დანერგვას შევძლებთ პროგრამების, პროექტების უკეთ მართვის მიზნით“.
საერთაშორისო კონფერენციაში მონაწილეობა მიიღეს საჯარო სექტორის, ბიზნესისა და საუნივერსიტეტო სფეროს ხელმძღვანელებმა და ექსპერტებმა, როგორც საქართველოდან, ასევე უცხოეთიდან.
