„მცოცავი ოკუპაციის გავლენა მოსახლეობის დენადობაზე“ – კავკასიის საერთაშორისო უნივერსიტეტმა კვლევის შედეგები წარადგინა

საქართველოს პარლამენტის ეროვნულ ბიბლიოთეკაში, „მეცნიერებისა და ინოვაციების ფესტივალი 2019“-ის ფარგლებში, კავკასიის საერთაშორისო უნივერსიტეტის სამეცნიერო პროექტის – „მცოცავი ოკუპაციის გავლენა მოსახლეობის დენადობაზე“, -კვლევის შედეგების პრეზენტაცია გაიმართა.

კვლევა, რომელიც კავკასიის საერთაშორისო უნივერსიტეტის „მცირე სამეცნიერო გრანტის“ ფარგლებში, შიდა ქართლში, გამყოფი ხაზისპირა სოფლებში განხორციელდა, 2008 წლის რუსეთ-საქართველოს ომისა და შემდგომი მცოცავი ოკუპაციით დაზარალებული მოსახლეობის წინაშე არსებულ გამოწვევებს ეხებოდა.

ღონისძიება კავკასიის საერთაშორისო უნივერსიტეტის რექტორმა, კახაბერ კორძაიამ გახსნა, რომელმაც მადლობა გადაუხადა კვლევის ავტორებს გაწეული სამუშაოსთვის და ასევე, შიდა ქართლის სამხარეო ადმინისტრაციას თანადგომისთვის. „ეს კვლევა უფრო ადრე იყო ჩაფიქრებული, ვიდრე ასე გააქტიურდებოდა მცოცავი ოკუპაციის საკითხი ქვეყანაში. სამუშაოები მეორე წელია მიმდინარეობს, კვლევა ძალიან მაღალ დონეზე ჩაატარეს ჩვენმა წარმომადგენლებმა. შედეგების პრეზენტაცია დავამთხვიეთ „მეცნიერებისა და ინოვაციების ფესტივალს“ და ამ ღონსიძიების ფარგლებში წარმოგიდგენთ“ – განაცხადა კახაბერ კორძაიამ.

კავკასიის საერთაშორისო უნივერსიტეტის სამეცნიერო კვლევების დეპარტამენტის ხელმძღვანელ სესილი გოგიბერიძის თქმით, ოკუპაციის თემაზე ხშირია პოლიტიკური განცხადებები და სამოქალაქო აქტივობა, თუმცა მეცნიერულ დონეზე ჩატარებული გამოკვლევები ნაკლებად არსებობს.

პროექტის ხელმძღვანელის ნინო მინდიაშვილის განცხადებით კი კონფლიქტურ ზონაში მუშაობა მარტივი არ იყო, ერთ-ერთ სოფელში უსაფრთხოების საკითხების გამო შესვლაც კი ვერ შეძლეს.

ოფიციალური მისალმებების შემდეგ, კვლევის მიმდინარეობისა და ძირითადი შედეგების შესახებ მოხსენება პროექტის კოორდინატორმა, კავკასიის საერთაშორისო უნივერსიტეტის პოლიტიკის მეცნიერების სადოქტორო პროგრამის დოქტორანტმა, არინა თავაქარაშვილმა წარადგინა. „ძალინ მნიშვნელოვანი კვლევაა, ჩვენ შემოგვაქვს აქცენტი იმაზე, იქ როგორ ცხოვრობენ, რა საჭიროებები აქვთ და არა იმაზე, კაბინეტიდან რა ჩანს. ძალიან მნიშვნელოვანია ამ საჭიროებების კვლევა კონფლიქტის შემდგომი მოგვარების დაწყებისთვის. ჯერ ამ კონფლიქტის გადაჭრისგან ძალიან შორს ვართ. უნდა მოხდეს ნდობის აღდგენა. სამი კომპონენტი: უსაფრთხოება, ეკონომიკური მდგომარეობა და მძიმე სოციალური ფონი, ეს ყველაფერი თუ არ შეიცვალა, პროცესი ვერ გაგრძელდება. კვლევის დაწყებისას ავიღეთ თეორიული წანამძღვრები, რაც ჩვენამდე არსებობდა, გამოკვლევები, რომლებსაც ვაღიარებთ. დანარჩენი ჩვენი აქცენტი გადის იმაზე, როგორ ხედავენ ისინი ამ პროცესს“, – განაცხადა არინა თავაქარაშვილმა.

ღონისძიებას კავკასიის საერთაშორისო უნივერსიტეტის ადმინისტრაცია, აკადემიური პერსონალი, სტუდენტები და სამეცნიერო წრეების სხვა მოწვეული სტუმრები ესწრებოდნენ.