„მეცნიერებისა და ინოვაციების ფესტივალი 2019-ის“ ფარგლებში, საქართველოს ტექნიკურ უნივერსიტეტში მრგვალი მაგიდა – დისკუსია: ,,GGSB – PLUS – საქართველო გერმანიის სამეცნიერო ხიდის (Science Bridge) მომავალი, განათლების, კვლევისა და ცოდნის ტრანსფერის გაფართოება და გაძლიერება” გაიმართა.
ღონისძიების მიზანია გერმანიასა და საქართველოს შორის განათლებისა და კვლევების გაძლიერება – გაღრმავება და სამომავლო განვითარების პერსპექტივების განხილვა; ასევე, მნიშვნელოვანი საკითხების წარმოჩენა, მკვლევართა შორის დიალოგის ხელშეწყობა და კავშირების გაძლიერება. ღონისძიებამ ფონდისა და იულიხის კვლევითი ცენტრის ერთობლივი პროგრამაში მონაწილე მკვლევარებსა და საქართველოს უნივერსიტეტების კონსორციუმის წარმომადგენლებს უმასპინძლა.
ღონისძიებაში მონაწილეობდნენ: გერმანული მხრიდან პროფესორი ჰანს შტროერი – ბირთვული ფიზიკის ინსტიტუტის დირექტორი, პროფესორი ასტრიდ კინდლერ შარი – ენერგიისა და კლიმატის კვლევითი ინსტიტუტის დირექტორი, პროფესორი ანდრო კაჭარავა – ბირთვული ფიზიკის ინსტიტუტი, ევა პორტიუსი – კორპორატიული განვითარების მენეჯერი. ქართული მხრიდან: საქართველოს ტექნიკური უნივერსიტეტის რექტორი არჩილ ფრანგიშვილი, საქართველოს პრემიერ მინისტრის მრჩეველი განათლების საკითხებში მიხეილ ჩხენკელი, შოთა რუსთაველის საქართველოს ეროვნული სამეცნიერო ფონდის გენერალური დირექტორი ზვიად გაბისონია, ქუთაისის საერთაშორისო უნივერსიტეტის რექტორი ალექსანდრე თევზაძე.
რუსთაველის ფონდის გენერალური დირექტორი ზვიად გაბისონია მიესალმა მრგვალი მაგიდის მონაწილეებს, ისაუბრა საქართველო-გერმანიის სამეცნიერო ურთიერთობის გაღრმავების მნიშვნელობაზე, ფონდსა და იულიხის კვლევით ცენტრს შორის აქტიურ ურთიერთთანამშრომლობასა და სამომავლო გეგმებზე. კონფერენციის მონაწილეებმა რუსთაველის ფონდსა და იულიხის სამეცნიერო კვლევით ცენტრს შორის გასაფორმებელი ახალი ხელშეკრულება განიხილეს, რომელიც 2020 წლისთვისაა დაგეგმილი.
ზვიად გაბისონიამ გერმანელი პარტნიორების წინაშე დასვა საკითხი ხელშეკრულების არეალის გაფართოების და გაცვლით პროექტებში ინჟინერიის ქვემიმართულების – ელექტრო ინჟინერიისა და და ლაზერული ინჟინერიის დამატების შესახებ, ასევე ისაუბრა გამოყენებითი კვლევების კომერციალიზაციასა და მასში გერმანული მხარის აქტიური ჩართულობის შესახებ.
